Il president american Donald Trump è sa platgà a Tavau. Curt avant las 10:00 è il convoi cun set helicopters sa platgà en in tact da minutas a Tavau. Pliras tschient persunas han persequità l'arrivada da Trump.
La plazza da platgar è survegliada da policists e schuldads ferm armads, uschia rapportan schurnalists da Keystone-SDA. Numerus autos da la regenza americana hajan transportà la delegaziun en lur hotel.
Curt avant las 08:30 era l'aviun «Air Force One» sa platgà sin l'eroport da Kloten. Là ha Trump midà en in dals helicopters pronts. Il convoi da helicopters da Super Pumas svizzers e Black Hawks americans è lura sgulà enturn las 09:00 en direcziun Tavau.
Segunda visita aifer dus onns
Tenor plan communitgà da la Chasa Alva vegn Trump spetgà en l'hotel Intercontinental. A las 11:30 duai il president american tegnair in pled d'avertura al WEF. Anc betg cler è tge che Trump metta en il center da ses pled.
Il schaner 2018 è Trump stà l'emprima giada al Forum mundial d'economia. Lura era el s'inscuntrà cun l'anteriura primministra britannica Theresa May, il primminister israelian Benjamin Netanjahu ed ina delegaziun dal Cussegl federal.
RTR novitads 10:00