L'iniziativa per ina taglia sin energia enstagl da plivalur saja privlusa. Cun la dismessa da la taglia sin la plivalur dispariss la pli impurtanta funtauna d’entrada da la Confederaziun, quai ha il comité grischun independent "Na sin taglia d'energia" explitgà venderdi a Cuira.
La nova taglia d’energia avess blers dischavantatgs, spezialmain per la classa mesauna, per manaschis pitschens e mesauns, sco era per regiuns periferas. L'iniziativa pretenda che la taglia sin plivalur vegn remplazzada cun in’auta taglia sin benzin, diesel, ieli e gas. Il suveran decida a l'urna ils 8 da mars.