Siglir tar il cuntegn

Header

cuntegn

Ulteriur Grischun Sursilvans festiveschan Son Giusep a la HIGA

Ils 19 da mars è il di da Son Giusep. En Surses, en parts dal Grischun talian ed en parts da la Surselva è quai di in firà. Perqua han blers Sursilvans visità quel di la HIGA a Cuira. Ina surpraisa agreabla per ils organisaturs.

audio
Bunura: Unda da Sursilvans a la HIGA
ord Actualitad dals 20.03.2018.
laschar ir. Durada: 2 minutas 40 Secundas.

Blers han spetgà che las portas da la HIGA s'avrian, tranter auter era intgins Rumantschs. Els sajan vegnids, perquai ch’els hajan liber cunquai ch'i saja firà. Els vegnian mintg'onn a guardar, tge ch'i dettia da nov.

Dapertut sentan ins a discurrer rumantsch. E quai cunzunt il dialect da Schluein, Sedrun, Mustér, Sumvitg, Trun, Surin e da Glion.

Bella surpraisa

D'organisar la HIGA enturn il firà da Son Giusep n'è dentant betg stà ina strategia conscienta. Ils organisaturs na savevan gnanc da quest firà.

Nus n’enconuschevan betg quest firà dal Son Giusep. Ma ussa scrivain nus quai segir e franc davos las ureglias.
Autur: Marco Engel schef da la HIGA

Marco Engel ha fatg cas, tge effect ch’il firà ha, e ch'el pussibilitescha a blers Sursilvans e Sursilvanas da vegnir a la HIGA. Sper il firà ha era la mal’aura carmalà ils visitaders. Ils Sursilvans han gì tschaffen d’entupar blers enconuschents. Uschia èn organisaturs, expositurs e visitaders cuntents cun il di dal Son Giusep.

RR actualitad 07:00

Artitgels legids il pli savens