Siglir tar il cuntegn
Inhalt

Ulteriur Grischun St.Antönien: Ils Turitgais vulan profitar dal sulegl grischun

In emprim project da far sur St. Antönien in ovra solara installada vi da rempars da lavina aveva fatg naufragi avant dus onns. Uss datti in nov project per in indriz solar autalpin. En in emprim pass duai la vischnanca adattar sia lescha da construcziun. Quai rapporta il schurnal regiunal da SRF.

Rempars da lavina, fotografads la stad.
Legenda: L'emprim project aveva prevesì dad installar panels solars sin ils rempars da lavina. Keystone

Ils plans, da construir in’ovra solara si sur St.Antönien derivan questa giada da las Ovras Electricas da Turitg EKZ. Quai ha confermà il pledader da medias da l’EKZ Noël Graber al schurnal regiunal da SRF. Il project nov è dentant auter ch’il vegl:

Ils moduls solars duajan vegnir montads vi dad ina construcziun a suga sur ils rempars da lavinas.
Autur: Noël Graberpledader da medias EKZ

Per pudair montar ils panels vuli dentant in midament da la lescha da construcziun da la vischnanca da Luzein, a la quala che St. Antönien fa part. La dumonda correspundenta è publitgada en il fegl uffizial. Quant ch’il project vegn a custar per propi n’è betg anc vegnì publitgà. Il pledader da medias ha ditg unicamain, ch’i sa tractia dad ina summa da plirs milliuns.

La vischnanca da Luzein è cuntenta, che l’idea da l’ovra solara survegn nov schlantsch:

Nus n’avain betg fatg quint, ch’i dat uschia spert puspè interess per ina tal’ovra.
Autur: Christian Kasperpresident communal, Luzein

Il project nov ha tenor Kasper dus avantatgs: dad ina vart possian ins producir energia netta e da l’autra attrair visitaders che vulan vesair ina giada ina tal’ovra autalpina. Il zercladur è prevesida ina radunanza d’orientaziun in chaussa.

RR actualitad 07:10