Siglir tar il cuntegn
cuntegn

Ulteriur Grischun Solidaritad envers ils requirents d'asil a Domat

La vischnanca da Domat e l'uffizi da migraziun dal chantun Grischun han orientà mesemna saira ils abitants da Domat davart il nov center temporar per requirents d'asil sut la chasa da scola a Caguils. Quai ch'ha gist procurà per las pli bleras dumondas e la pli gronda critica.

Legenda: Guardar il video Infurmaziun a Domat davart il center per requirents. Durada 03:48 minutas.
Or da Telesguard dals 01.10.2015.

Ch'il center per requirents d'asil vegn gist sut la chasa da scola a Caguils ha procurà per las pli bleras dumondas e la pli gronda critica da las radund 150 persuna ch’eran preschentas a l’orientaziun. Tut ils responsabels han sincerà ch'ins saja conscient da questas resalvas e ch’i dettia mesiras per evitar problems.

24 uras 2 persunas che surveglian

Marcel Suter ha explitgà ch’i dettia per exempel ina gruppa accumpagnanta che sa cumpona tranter auter da geniturs, scolasts, vischins e represchentants da la vischnanca. Quella gruppa persequiteschia la situaziun e fetschia attents sin eventuals problems. Plinavant dettia quai reglas da sa cuntegnair liantas per ils requirents d'asil ed i saja là 24 uras 2 persunas che surveglian il center ed il conturn.

Be ina vusch vehementamain critica

Ina persuna ha ditg cleramain ch'ella na craja nagut als responsabels e che quai saja tut ina portgaria. Tut en tut han ins dentant sentì blera chapientscha e solidaritad cun ils requirents d'asil. Cura ch'ina mamma che ha sezza uffants a Caguils ha appellà da betg tractar ils requirents d'asil gia oravant sco criminals, ha numnadamain l'entria sala applaudì.

Center da requirents a Domat

Tenor il manader da l’uffizi da migraziun grischun, Marcel Suter, dovra il chantun urgent plaz per requirents d’asil uschia che las localitads duain vegnir avertas la fin dal mais. Las localitads porschan plaz a maximal 80 persunas che restan in mez onn. I sajan per gronda part umens e dunnas giuvnas or da l'Eritrea.