Siglir tar il cuntegn
Inhalt

Ulteriur Grischun Signuradi: Mitschà cun la tema questa notg

Suenter la notg da schelira dad ier èn ils viticulturs dal Signuradi mitschads questa notg. Sco quai ch'il president da la branscha «Vin Grischun» Georg Fromm ha confermà, n'hajan ils purs stuì prender naginas mesiras per proteger lur vignas - las temperaturas na sajan mai crudadas sut nulla grads.

Il maletg mussa sanester in chatsch d'ina vigna ch'è schelà e sanester in chatsch saun e frestg.
Legenda: Sanester in chatsch da la vigna ch'è schelà, dretg in chatsch frestg e saun. RTR/nc

Suenter la notg da schelira da la mesemna èn ils viticulturs dal Signuradi mitschads la notg sin il venderdi. Sco quai ch'il president da la branscha «Vin Grischun» Georg Fromm ha confermà, n'hajan ils purs stuì prender naginas mesiras per proteger lur vignas cunquai che las temperaturas na sajan mai crudadas sut nulla grads. Quai che pertutga ils donns da schelira da la notg sin gievgia n'ha Fromm anc pudì far naginas indicaziuns.

Brischar vinars per proteger las vignas

En vista a las notgs fraidas èsi vegnì endament a Luzi Boner ch'el haja anc 300 liters da quest destillat ch'i dat avant che brischar il vinars (per tudestg «Vorlauf»). Quest ha el derschì en sadellas da sturs, repartì quellas en sias vignas e dà fieu.

Jau na sai gnanc daco ch'jau hai tegnì si 300 liters da quest vinars en tschaler.
Autur: Luzi Bonerpur da vin e brischa-vinars da Malans
Il maletg mussa il pur da vin Luzi Boner en sia vigna a Malans
Legenda: Luzi Boner en sia vigna a Malans. RTR/nc

L'entira notg sin gievgia ha Luzi Boner dentant ponderà cura envidar il meglier ses «fieus da vinars», cunquai ch'el quintava ch'els ardian be circa 3 uras. Ma i ha funcziunà: L'emprima impressiun mussa ch'el ha circa 10% dals chatschs da las vignas ch'èn schelads - quai è circa en la media dals auters viticulturs, che han per part envidà chandailas grondas tranter las vignas.

La «reserva da schelira» fiss la schliaziun

Igl è in vegl tric dals purs da vin: Cura ch'ins taglia enavos las vignas, lura na laschan ins betg be star in u dus chatschs principals, mabain anc in terz. Quest terz chatsch crescha tut ad aut ed è pli resistent cunter las fradaglias. El vala era sco reserva en cas che tschels dus chatschs schelan.

Ozendi na dovria dentant bunamain nagin pur da vin quest tric pli, conceda il president da la branscha «Vin Grischun» Georg Fromm. Suenter las perditas da quest onn è el dentant persvadì che la gronda part dals purs da vin dal Signuradi vegnan l'auter onn puspè a far diever dal tric da la «reserva da schelira».

RR novitads 07:00