Siglir tar il cuntegn
Inhalt

Ulteriur Grischun «Sche Gruber va, lura vom er jau»

Il president da la cumissiun da furmaziun da la citad da Cuira, Peter Kamber, sa retira surprendentamain per immediat.

Ina foto da Peter Kamber.
Legenda: Peter Kamber sa retira da la cumissiun da furmaziun da Cuira. MAD

Il pli impurtant en curt:

  • Peter Kamber sa retira da l'uffizi sco president da la cumissiun da furmaziun.
  • El va perquai ch'el na vul betg pli sustegnair la direcziun senza Jann Gruber.
  • Ils auters commembers e Patrick Degiacomi, il suprastant da la citad da Cuira èn surprais.

Sur da sia demissiun haja Peter Kamber infurmà ils commembers da la cumissiun da furmaziun la gievgia saira. Sco Patrik Degiacomi ha ditg envers RTR saja quai stà per el ina gronda surpraisa. Identic ha er reagì la vice-presidenta da la cumissiun Martha Widmer-Spreiter.

Commembers da la cumissiun deploreschan

Kamber ha manà la cumissiun sco president dapi l'entschatta da quest onn. Las sesidas haja el adina manà cun gronda cumpetenza professiunala, plain respect ed cun cleras finamiras. Ils commembers da la cumissiun deploreschian che Kamber sa retiria. Quai scriva la chanzlia da la citad en ina communicaziun a las medias. Ad interim surpiglia la vice-presidenta Martha Widmer-Spreiter il presidi da la cumissiun.

Ins po dir consequent u simplamain stinà. Ma jau na vi betg sustegnair la direcziun senza Jann Gruber. Sche el va, lura vom era jau.
Autur: Peter KamberPresident cumissiun da furmaziun

Per Kamber saja la decisiun stada ina consequenza logica. Suenter che Jann Gruber bandunia la scola saja uss dumandada ina nova direcziun da strategia. Per manar la scola da Cuira effectiv ed effizient, saja decisiv, ch'ils champs strategics ed operativs possian lavurar bain ensemen.

Demissiun en temp da grondas midadas

Per la scola da Cuira croda questa demissiun en in temp da grondas midadas: Mez december ha la scola da Cuira communitgà ch'il directur da la scola Jann Gruber bandunia la scola – quai pervia da differenzas d'opiniun cun ses schef, il cusseglier da la citad Patrik Degiacomi. E la fin favrer va l'actual vice-directur da la scola, Reto Thöny, en pensiun.

RR novitads 14:00