Dus maina-fatschenta vegnan chastiads pervia da sfalsificaziun da rauba a chastis cundiziunads e multas
9700 francs ord l'atgna bursa
Ils chastis cundiziunads muntan a 27'000 respectivamain 50'400 francs per ils maina-fatschenta. Quai vul dir sch'els cuntrafan aifer in temp inditgà a la lescha ston els pajar quest chasti. Vitiers vegn ina multa da 3'400 respectivamain 6'300 francs.
la decisiun n'è dentant anc betg en vigur, quai vul dir che las duas persunas pon anc far recurs aifer 10 dis.
Ei sa buc esser ch'ins fa da quellas caussas e vegn sentenziaus mo cun in tal castitg.
Cura che Felix Venzin ha udì da la decisiun da la procura publica è el sco emprim stà trumpà. Il president da la branscha da charn dal Grischun avess spetgà in pli ferm signal.
Il scandal da charn haja gì grondas consequenzas per la branscha. La reputaziun dals mazlers haja patì, uschia Felix Venzin. «Igl è stà in scandal d'ina nursa naira, ma tuts ston magliar ora quai».
Denunzia anonima ha sclerì il scandal
Vegnì a la glisch era il scandal da charn cun ina denunzia anonima il november 2014. Sin las rinfatschas che la Carna Grischa pacheteschia enturn charn da l'exteriur, mettia si novas etichettas e vendia quella silsuenter sco charn svizra, ha la procura publica cumenzà ad investigar. Plinavant hai dà ina razzia en las localitads a Landquart.
Firma ha fatg concurs
Carna Grischa n'ha betg survivì il scandal da charn. L'emprim è la vendita sa reducida e silsuenter ha la firma stuì annunziar concurs. 27 emploiads avevan pers lur lavur la stad 2015.
RR novitads 11:30