Siglir tar il cuntegn

Header

Uffants sin ina ballabaina.
Legenda: Ils uffants duain savair tudestg avant ch'ir en scolina. Keystone
cuntegn

Ulteriur Grischun Promover tudestg avant d’ir en scolina

Tut ils uffants da Cuira duessan avair enconuschientschas suffizientas dal tudestg avant d’ir a scolina. Perquai ha il servetsch social da Cuira preschentà ses nov program da promover ils uffants avant ch’els van a scolina.

Eruir enconuschientschas dal tudestg

En l’emprima lingia vai ina giada per eruir las enconuschientschas dal tudestg tar ils uffants da Cuira che vegnan en scolina, uschia che tut las famiglias cun in uffant da l’annada 2011 han survegnì in questiunari cun dumondas. Sa basond sin quest questiunari evaluescha l’Universitad da Basilea tge uffants che dovran in sustegn supplementar avant d’ir a scolina.

Ir en gruppa da gieu

Quai munta ch’ils geniturs vegnan lura fatgs attent ch’i fiss meglier per ils uffants pertutgads dad ir gia en ina gruppa da gieu u en ina canorta avant la scolina, là duain ils uffants lura emprender tudestg a moda immersiva: vul dir ils uffants emprendan tudestg cura ch’els audan il tudestg.

En pli duessan er ils geniturs dals uffants pertutgads vegnir instruids e promovids co ch’els pon gidar lur uffants d’emprender tudestg ed uschia era da s’integrar meglier.

Program n’è il mument betg obligatoric

Il mument n’è l’entir program anc betg obligatoric: quai duess dentant sa midar uschè spert che la citad da Cuira sa quants uffants che dovran circa mintga onn in sustegn supplementar da tudestg e quant gronda che la purschida da la citad da Cuira è insumma, pia quants plazs da canortas e quantas gruppas da gieu ch’èn avant maun.

Ina giada obligatoric ston ils uffants tranter 3 e 4 onns lura ir duas giadas in mez di en la gruppa da gieu u en la canorta. Ils geniturs dals uffants vegnan sustegnids tut tenor salari cun 20 fin 80% dals custs per la gruppa da gieu. Ils questiunaris ston vegnir returnads fin ils 20 da favrer.