Posthotel Arosa: Il fieu è sut controlla, l'hotel è ina ruina

Actualmain cumbattan ils pumpiers cuaditschs da l'incendi da questa notg. Tenor la polizia chantunala è l'hotel vegnì donnegià cumplettamain. Tar l'incendi en il Posthotel Holiday Villa èn vegnidas blessadas 13 persunas. Il fieu era rut ora il venderdi suentermezdi. La polizia investighescha.

Quai ch'è enconuschent:

  • Il fieu n'è anc betg stiz dal tut. Ils pumpiers èn anc adina en acziun. Els ston stidar ils fieus pitschens dad ordadora. La statica dal hotel sto vegnir examinada avant ch'entrar.
  • Ina persuna ha ina greva tissientada da fim, duas ina mez-greva. Quellas èn vegnidas sguladas cun la Rega a Cuira en l'Ospital chantunal. 10 persunas èn vegnidas blessadas e tractadas en il lieu.
  • Ils radund 150 giasts, ch'èn vegnids evacuads, èn plazzads en auters hotels. Il donn vid il hotel è total.
  • Ils pumpiers èn stads en acziun cun passa 100 persunas, ils pumpiers da l'entira Val Scanvetg cun sustegn da Cuira e Landquart. Uss lavura ina squadra pli pitschna.
  • In spezialist da la polizia da fieu ha cummenzà cun investigaziuns. La raschun dal fieu n’è anc betg enconuschenta, scriva la polizia.
  • La lingia da tren ad Arosa è stada interrutta durant la notg. Dapi las 08:48 curseschan ils trens puspè tenor urari.
Laschar ir video «L'incendi al Posthotel Arosa (mad: Lolo Christen)»

L'incendi al Posthotel Arosa

0:29 min, dals 30.12.2016

Il brischament dal Posthotel ad Arosa

Il venderdi suentermezdi

Curt suenter las quatter aveva Marcus Corai, il pledader da la polizia chantunala, confermà sin dumonda dad RTR l'incendi en il Posthotel ad Arosa. Il clom d'agid era rivà las 15:59 tar la polizia. Il di suenter communitgescha la polizia, ch'il fieu è rut ora en ina da las auzadas sut da l'hotel. Las forzas da salvament eran sin il lieu cun passa 100 persunas. Ils pumpiers da tut il Scanvetg han survegnì sustegn da Cuira ed èn per la saira perfin da Landquart. Trais pumpiers èn vegnids blessads levamain ed han pudì vegnir tractads sin il lieu.

Ils radund 150 giasts da l'hotel han pudì vegnir evacuads tuts. En las medias socialas cumenzan a cursar ils maletgs da l'incendi.

Tut ils giasts da l'hotel èn vegnids evacuads

Ad Arosa cumenza immediatamain la tschertga per dar alloschi als radund 150 giasts evacuads dal Posthotel, di Pascal Jenny, il directur da turissem dad Arosa. Suenter las set communitgescha la polizia la cifra da 13 persunas blessadas.

In um (85) ha ina greva tissientada da fim, in uffant (8) ed ina dunna (56) han ina tissientada main greva. Els èn vegnids sgulads cun trais helicopters da la Rega en l'Ospital chantunal a Cuira. 10 persunas cun tissientadas levas vegnan tractadas ad Arosa.Suenter las 21:00 ha la polizia communitgà ch'ils radund 150 giasts dal Posthotel sajan vegnids plazzads en auters hotels.

Il Posthotel è directamain sper il binari da la Viafier retica

Cun quai ch'il Posthotel sa chatta en vischinanza dals binaris da tren è stada interrutta la lingia da tren tranter Arosa e Litzirüti. Tranter las duas staziuns avevi dà in servetsch da bus. Tgi ch'era en viadi cun il tren aveva dentant da calcular cun dapli temp. Dapi la sonda a bun'ura cursescha il tren danovamain tenor urari.

La sonda a bun'ura: L'hotel è donnegià dal tuttafatg

L'avantmezdi suenter l'incendi èn ils pumpiers anc adina èn acziun cun ina trentina da persunas. I sa tracta da stizzar cuaditschs. Ils pumpiers lavuran da dador vart cun quai ch'igl n'è anc betg clar, in tgenin stadi che la statica da l'hotel sa chatta. La polizia communitgescha dentant, che singulas auzadas sajan curdadas en.

Dal Posthotel ad Arosa, in hotel da quatter stailas, è restada mo anc ina ruina ch'è donnegiada dal tuttafatg.

RR novitads 17:00++ / 06:00++

L'incendi en las medias socialas:

Posthotel Arosa brennt!

Ein von Manuela Cagienard (@manuelacagienard) gepostetes Foto am