Siglir tar il cuntegn

Ulteriur Grischun Pendicularas grischunas: «Il cumbat da pretschs è ruinus.»

Martin Hug, il president da las pendicularas grischunas, ha chattà clers pleds a la radunanza generala a Tavau.

Martin Hug
Legenda: Martin Hug: Il president da las pendicularas grischunas ha chattà clers pleds a la radunanza generala. mad

Quai che tschertas pendicularas fetschian il mument, saja fatg termagls cun il fieu, uschia Martin Hug. La strategia da sbassar ils pretschs rinforzia il cumbat fin ch'ina u l'autra pendiculara stoppia ceder. «Pretschs dinamics» na veglia betg dir be sbassar, mabain er auzar els sche la dumonda saja gronda.

Plinavant ha Martin Hug appellà da cooperar pli fitg entaifer la branscha. Per la stagiun d'enviern sajan ins però da buna speranza. La prevendita marschia bain e l'emprima naiv fetschia gust sin l'enviern.

Festa da giubileum cun l'emprima dunna a la testa

I n'ha dentant betg mo dà pleds critics ed in zic bunas speranzas per l'enviern che vegn – ils responsabels da las pendicularas grischunas han er anc giu in motiv da far festa: Numnadamain il giubileum da 50 onns. L'organisaziun è vegnida fundada l'onn 1967 sco uniun da las pendicularas e dals runals grischuns.

Ils anteriurs presidents han guardà enavos sin temas che han fatschentà l'organisaziun tetgala ils ultims 50 onns. Tranter auter:

  • L'engaschament per meglras circumstanzas da fatschenta
  • La critica permanenta envers l'organisaziun tetgala svizra
  • Il marketing e la collavuraziun cun Grischun vacanzas
  • Ils pretschs

En il rom da la radunanza generala han ils delegads plinavant elegì Manuela Seelig en suprastanza. La directura da las pendicularas da Cuira è l'emprima dunna en questa funcziun.

RR novitads 16:00