Uss è sulettamain anc l’emprima ura parcar sin l’Obere Au gratuita. Dal tut gratuit resti sulettamain per ils utilisaders dals indrizs da sport, quai èn il bogn cuvert, il bogn en il liber e la sauna. Il temp da parcar maximal vegn limità sin 24 uras. Il motiv persuenter saja dad evitar autos parcads permanent sin l’areal, ha ditg Urs Marti, il president da la citad da Cuira.
La regla cun parcadis gratuits na saja betg pli stada adequata, sco Marti ha ditg ad RTR. En cumparegliaziun cun las ulteriuras citads en Svizra era Cuira bunamain la suletta cun ina tala purschida gratuita. Ils parcadis eran tenor la citad da Cuira savens occupads da pendularis u d’autos parcads per in pli lung temp.
Cun questa midada quinta la citad da Cuira cun entradas supplementaras da radund 400’000 francs ad onn.
