Siglir tar il cuntegn
cuntegn

Ulteriur Grischun Ovra solara Sankt Antönien è giud maisa

Il project per l'ovra solara a Sankt Antönien è giud maisa suenter che la radunanza communala ha refusà ier saira il credit da 170’000 francs per la planisaziun en detagl.

L’implant da test sin ina lavinera a St. Antönien.
Legenda: L’implant da test sin ina lavinera a St. Antönien. Keystone

La suprastanza deplorescha la decisiun e communitgescha ch’il project na possia uschia betg pli vegnir persequità vinavant.

Il suveran da St. Antönien aveva refusà ier saira a la radunanza communala il credit da 165’750 francs per la planisaziun en detagl e per procurar per ils meds finanzials. Daners ch’i duvrass tenor la suprastanza urgentamain, per pudair planisar l’ovra en detagl ed uschia er pudair terminar il project anc avant l’october 2016. Fin lura stuvess l’ovra esser a fin per anc survegnir l’indemnisaziun da la Confederaziun per cuvrir ils custs da la furniziun d'electricitad.

Sper il credit mancan er anc 800’000 francs per insumma pudair realisar il project. Daners che la suprastanza vuleva recaltgar fin la fin d’avust 2015 cun ina acziun speziala via ina plattafurma online ed autras stentas da vender certificats per uschia pudair cumenzar ad uras cun l’emprima badigliada.

Sch’in nov investider avess da s’engaschar per il project u sch’i dettia ina nova schanza cun autras cundiziuns da basa politica, vegnia la vischnanca a valitar la situaziun da nov.

RR novitads 16.00