Siglir tar il cuntegn
cuntegn

Ulteriur Grischun Ospital Tavau passa 5 milliuns deficit

L’Ospital Tavau SA ha fatg l’onn 2017 in deficit da 5,1 milliuns francs. Quai scriva l’ospital. Ina collavuraziun cun l’Ospital chantunal a Cuira duai gidar da ballantschar las grondas differenzas dals basegns durant la stad e l’enviern.

Dus letgs vits.
Legenda: En media ha l'ospital da Tavau tractà 2'300 cas per onn. L'onn 2017 dentant 300 pli pauc (maletg da simbol). Keystone

Da contribuir saja quest resultat tranter auter a la stagiun d’enviern cun fitg pauca naiv (2016/2017). Uschia sajan radund 300 persunas damain vegnidas tractadas staziunar che l’onn avant, pia be bun 2’000 cas. Quai correspundia ad ina perdita da rendita da radund trais milliuns francs. Er il dumber da tractaments ambulants saja sa reducì cumpareglià cun l’onn avant, quai da stgars 43’000 sin bun 38’000.

Discurs da partenadi tranter ospitals Tavau e Cuira

Per far frunt al trend negativ, vul l’ospital da Tavau s’orientar da nov. Las grondas differenzas da dumondas suenter letgs d’ospital durant l’enviern e la stad possian be vegnir minimisadas entras collavurar cun in partenadi ferm. Entant saja sa mussà che l’Ospital chantunal a Cuira possia esser in tal candidat. Ils discurs tranter ils responsabels dals ospitals e la vischnanca da Tavau sajan sin buna via.La finamira da collavurar saja d’augmentar la cumpetenza medicinala a Tavau.

Nov cussegl d'administraziun

Plinavant è vegnì elegì a la radunanza generala in nov cussegl d'administraziun che sa cumpona da sis persunas:

  • Tarzisius Caviezel, president communal da Tavau, president dal cussegl d'administraziun
  • Arnold bachmann, Dr. oec. HSG, parsura da la direcziun, Ospital chantunal dal Grischun
  • Adrian Bisig, Dr. med., president da l'uniun grischuna dals medis e medi spezialist medischina interna
  • Thomas Fehr, Prof. Dr. med., directur medicinal, schefmedi e manader da departament medischina interna, Ospital chantunal dal Grischun
  • Monica von Toggenburg, manadra departament da tgira, Ospital chantunal dal Grischun
  • Beat Villiger, Dr. med., SeniorConsultant Medical Health Center & Clinic, Ragaz Bogn

RR novitads 16:00