Siglir tar il cuntegn

Header

cuntegn

Nutriment sanadaivel «Era tschigulatta fa part dad in nutriment sanadaivel»

La tematica da sa nutrir sanadaivel è ominpreschenta, saja quai en las raits socialas u en las medias – mintgin ha in’autra opiniun davart il dretg nutriment. In terapeut da nutriment dat scleriment.

Tenor ina dieta saja quai fitg sanadaivel da mangiar nagut auter che ananas per in’entira emna. Tar in’autra dieta vegn cusseglià da desister da tut las dultscharias. Pia, i dat bleras furmas da dietas e bleras opiniuns. In terapeut da nutriment declera, tge che fa part dad in nutriment sanadaivel.

audio
Bunura: Nutriment – co sa nutrir sanadaivel
ord Actualitad dals 21.08.2019.
laschar ir. Durada: 3 minutas 16 Secundas.

Desister na sto betg esser

Nick Vonzun è terapeut da nutriment a l’Ospital chantunal a Cuira. El ha 12 onns experientscha sin il champ da la sanadad en connex cun il nutriment. In nutriment sanadaivel per in uman normal duaja esser varià e cumplet, cusseglia el. Quai vul dir ch’ins n'ha betg da desister da mangiativas – cunzunt era betg da dultscharias. Il dosagi da tuttas mangiativas saja pli impurtant.

Tut è tissi e nagut è tissi. Sco Paracelsus aveva gia ditg. Il dosagi è l’essenzial.
Autur: Nick Vonzun terapeut da nutriment

Quai vul dir che las tschaveras ston esser in bun mix da tut las substanzas nutritivas ch’il corp dovra per funcziunar senza deficits. Il corp dovra vitamins, proteins ed oravant tut idrats carbonics. Ils idrats carbonics èn nossas funtaunas d’energia che vegnan duvradas mintgadi. Ils «buns» idrats carbonics chattan ins per exempel en products da graun entir. En general duajan ins s’orientar a la piramida da nutriment. Uschia possian ins controllar, sche la moda da mangiar correspundia al dretg nutriment.

La piramida da nutriment.
Legenda: La piramida da nutriment da l'Uffizi federal da segirezza alimentara e fatgs veterinars. Uffizi federal da segirezza alimentara e fatgs veterinars (USAV).

Faus amis

Ils «main» buns idrats carbonics èn il zutger en dultscharias. Quai na munta dentant betg ch’ins sto desister dal tut da quels, mabain mangiar quels plitost cun mesira. Era il suc da fritgs è in faus ami. Tenor il terapeut da nutriment possia quel cuntegnair uschè bler zutger sco ina buttiglia da «Coca-Cola».

Veglias sabientschas

Ina sabientscha di ch’ins duaja mangiar bler la damaun e pauc la saira. Nick Vonzun di che quai na constettia betg pli per nossa vita dad oz. Pli baud lavurava la glieud pli bler sin il funs ed en mastergns artisanals.

Quai è ina sabientscha che mia tatta ha anc raquintà a mai. Ozendi na constat quai betg pli.
Autur: Nick Vonzun terapeut da nutriment

Quai n’è ozendi betg pli il cas. Dapli glieud lavura en biros davant ils computers. Uschia dovr'ins oz era pli pauc energia durant il di. Il medem valia era per la quantitad da tschaveras ch’ins mangia en in di. Impurtant saja simplamain da dar al corp cun tut las substanzas nutritivas ch’el dovra.

audio
Bunura: Nutriment – cussegls dal cuschinier da dieta
ord Actualitad dals 21.08.2019.
laschar ir. Durada: 2 minutas 39 Secundas.

RR actualitad 07:00

Artitgels legids il pli savens