Siglir tar il cuntegn
Inhalt

Ulteriur Grischun Novs silos da sal per garantir vias segiras l’enviern

In nov bajetg cun silos da sal tar l’access Cuira-sid da l'A13 planiseschan l’Uffizi federal da vias Astra ensemen cun il chantun e la citad da Cuira.

Visualisaziun d'in bajetg e pliras vias
Legenda: La visualisaziun dal bajetg da silos tar l'access da l'autostrada A13 a Cuira. MAD

Il nov bajetg da silos duai segirar in servetsch d’enviern effizient e spert sin las vias. Da rumir las vias da la naiv e procurar per vias senza glatsch haja in’auta prioritad, scriva la Astra. Il bajetg sper l’access a l’autostrada A13 saja la resposta.

Passa 2'000 cubics sal

Il nov bajetg cumpiglia quatter silos da sal, cun ina capacitad totala da 2’000 m3. Vitiers vegnan plirs indrizs spezials, ed in silo da sal pli pitschen per la citad da Cuira. Il bajetg planisà vegniss 17 meters aut, sumegliant als bajetgs en la vischinanza.

Il project duai custar 4,5 milliuns francs. Va tut tenor plan, duess il bajetg esser pront sin la stagiun d'enviern 2018/2019.

RR novitads 18:00