Sin l'avertura dals novs bajetgs da la surbajegiada «Capricorn», datiers da la staziun da Cuira, duai era la via vegnir sanada e creada da nov. Quai propona il cussegl da la citad al parlament. Per 1,8 milliuns francs duai la via Steinbock survegnir novas lignias d'aua, da chanalisaziun, d'electricitad sco er ina colliaziun per stgaudament a distanza.
Vitiers duai la via survegnir ina cuverta da crappa d'Andeer sco la via da la staziun. En la nova zona d'inscunter vegnia plantà differentas spezias da plantas. Il decurs da las stagiuns dettia quai in maletg variant ed augmentia l'attractivitad, scriva il cussegl da la citad en il messadi.
La finamira è da finir las lavurs vid la via fin l'avertura da la surbajegiada «Capricorn», la fin november 2019.
RR novitads 12:00