Cumpareglià cun l’onn 2008 ha Claustra pers radund 40% da las pernottaziuns, ed uschia taxas da 550’000.- francs l’onn. La lescha actuala saja antiquada e cumplitgada, di il president communal Kurt Steck. La nova lescha saja pli gista.
Possessurs d'abitaziuns secundaras ston pajar il quint
Danov na duai betg pli vegnir pajà per notg, mabain per chombra, letg u grondezza d’abitaziun. La vischnanca quinta cun novas entradas da passa 1 milliun francs. Quests danes gidian da finanziar il bogn, las loipas, las sendas da viandar e la patinera. La finamira è da mantegnair il standard d’ozendi.
La gronda part da quests milliuns stuessan ils possessurs d'abitaziuns secundaras pajar. Quels hajan pajà memia pauc enfin ussa, di il president Kurt Steck.
Ils possessurs sa dostan
Quai saja simplamain ina pretensiun, di Karl Boxler da la cuminanza d’interess dals possessurs d'abitaziuns secundaras. Natiralmain n’hajan els betg tschaffen da pajar dapli, tant pli che la vischnanca n’haja gnanc ina visiun turistica, tge far cun ils daners. Ultra da quai na saja quai betg gist bel ch’els vegnian vesids sco osps e betg sco abitants.
RR actualitad mezdi 11:00