Siglir tar il cuntegn
Inhalt

Ulteriur Grischun Nagins helicopters sur las vignas dal Signuradi

La notg duai vegnir pli fraid en il Grischun ed era en il Signuradi. Per ils viticulturs vala quai uss da spendrar la racolta da quest onn, però betg cun l'agid da helicopters sco planisà.

Vigna el Signuradi.
Legenda: En quest stadi tempriv po la schelira donnegiar massivamain la vigna. SRF

Ils purs da vin dal Signuradi na sgolan questa notg tuttina betg cun helicopters per evitar che lur ivas schelian. Per motivs da segirezza n’hajan els betg survegnì la lubientscha da sgular. Ils 4 helicopters che fissan stads a disposiziun hajan be 1 motor. Per dentant sgular durant la notg ed uschè bass dovria helicopters cun 2 motors. Quai ha ditg il mainafatschenta da «Vin Grischun» Leonhard Kunz sin dumonda dad RTR.

Cun ils rotors dals helicopters han ins vulì smatgar a bass l'aria pli chauda e cunquai evitar che las vignas schelian. Quai ha declerà il president da la branscha «Vin Grischun» Georg Fromm al schurnal regiunal da radio SRF.

Questa mesira nun-convenziunala enconuscha Georg Fromm surtut da la Nova Zelanda, nua ch'el ha lavurà pli baud. Ils purs da vin dal Signuradi avevan bain discutà il diever da helicopters a lur sesida d'urgenza, la lubientscha da l'uffizi federal per il traffic aviatic BAZL è dentant vegnida pir a curta vista.

Era chandailas duain gidar

In'ulteriura mesira per evitar la schelira èn grondas chandailas che vegnan plazzadas tranter las vignas. Quellas èn dentant fitg tschertgadas e blers purs da vin n'han gnanc pli chattà talas da cumprar. Ad els cusseglia Georg Fromm d'almain segar il pastg en las vignas, per che l'aria fraida en las plauncas possia cular vers la val.

Tema da perditas massivas

Per la notg sin gievgia quintan ils meteorologs cun temperaturas da -1,2 grads a Maiavilla e -2 grads a Jenins. Cura che las temperaturas crodan sut 0 grads discurran ins da scheliras. Ils purs da vin teman perditas massivas da la racolta, cunquai che las plantas chatschan actualmain ed èn fitg sensiblas.