Siglir tar il cuntegn
Inhalt

Ulteriur Grischun Naginas mesiras tar la rundella Cuira-sid

Gist duas giadas èsi capità aifer in'emna: En la rundella gronda a Cuira-sid han dus automobilists prendì il fauss vial ed èn charrads sin la faussa vart sin l'autostrada A13. L'uffizi federal per vias (Astra) na vesa dentant nagin basegn d'agir.

Automobilist ch'è charrà sin il fauss vial davent da l'access Cuira sid.
Legenda: Quest automobilist è charrà sin il fauss vial ils 11 d'avust 2016. Polizia chantunala

La rundella Cuira-sid saja nova e confurma a las normas, ha accentuà il pledader da l'uffizi federal per vias Eugenio Sapia sin dumonda dad RTR. Ins haja bain curt discutà la situaziun - mesiras per dapli segirtad na sajan dentant planisadas naginas.

«Ina rundella nova e pretensiusa»

La polizia grischuna enconuscha las difficultads da charrar correct en la rundella Cuira-sid. Per blers saja la rundella nova ina sfida e forsa era cumplitgada, ha concedì il pledader Daniel Zinsli. Che dus automobilists sajan charrads sin il fauss vial aifer be in'emna, gliez saja ina casualitad.

Savens na sappian ils automobilists silsuenter betg declerar daco ch'els hajan prendì la faussa via. Cler è dentant che la polizia piglia davent ad els il permis dad ir cun auto anc sin il lieu. Automobilists da l'exteriur survegnan in scumond da charrar en Svizra ed en il Principadi dal Liechtenstein. Plinavant vegnan els denunziads tar la procura publica dal Grischun.

Dus automobilists sin il fauss vial da la A13

L'automobilist tudestg da 47 onns ha remartgà ses sbagl mardi saira ed ha pudì sa manar sin l'autostrada. Ina patruglia da la polizia chantunala ha silsuenter franà el.

Gia la gievgia passada era in automobilist charrà sin il fauss vial da l'autostrada A13. Ina patruglia da la polizia chantunala ha per cas vesì co l'um da 76 onns è sa manà sin l'autostrada ed ha fatg attent el cun sirena e chazzola blaua.

RR novitads 10:00