Siglir tar il cuntegn
cuntegn

Ulteriur Grischun Nagin campiunadi mundial da para ski a Claustra

Il comité paralimpic saja sa decidì cunter Claustra e per l'Italia e la Slovenia sco lieu d'occurenza per il campiunadi mundial da para ski 2019, quai scriva il Bündner Tagblatt.

Para ski atlet che sesa en sia sutga da cursa.
Legenda: Il para ski alpin datti en differentas variantas - qua va l'atlet sesend en la cursa. Keystone

Sco Peter Baetschi, manager d'event da Claustra di envers il Bündner Tagblatt dettia quai divers motivs, daco che Claustra n'haja betg survegnì il consentiment dal comité paralimpic. Il grond punct da discussiun saja la differenza d'autezza sin la pista da la cursa rapida stà. La pista da Claustra porschia mo ina differenza da 450 meters dal start fin l'arrivada. Il comité vuleva dentant ina pista cun ina differenza d'autezza da 600 meters.

In lieu d'occurenza cun experientscha

Plinavant suppona Baetschi ch'il comité paralimpic vuleva esser da la vart segira, suenter che Sursaissa aveva annunzià l'avrigl, da tuttina betg manar atras il campiunadi mundial da para ski ed è perquai sa decidì per l'Italia e la Slovenia sco lieu d'occurenza. Tschertas cursas han lieu a Kranjska Gora en Slovenia – ina destinaziun cun experientscha cun cursas internaziunalas. Là han regularmain cursas da la cuppa mundiala da ski alpin lieu.

RR novitads 12:00