Siglir tar il cuntegn
cuntegn

Ulteriur Grischun Local da cult 'Bolgen Plaza' cun nova speranza

Per ch'il 'Bolgen Plaza' a Tavau possia exister vinavant saja ina midada da concept inevitabla, ha ditg Tarzisius Caviezel, il landamma da Tavau. Las fronts sajan en moviment e forsa ch'i dettia gia ina schliaziun sin questa stagiun d'enviern.

Il 'Bolgen Plaza' a Tavau - in local da cult.
Legenda: Il 'Bolgen Plaza' a Tavau - in local da cult. Keystone

Mardi saira èn s'inscuntrads represchentants da la vischnanca e da las pendicularas cun il possessur da abitaziuns ch'aveva purtà plant cun success davant Tribunal federal pervi dal local da sortida 'Bolgen Plaza'. Lez aveva cuntanschì ch'il local stoppia en l'avegnir gia serrar a las set la saira pervi da la canera. Il discurs da mardi saira saja stà fitg constructiv, ha Caviezel confermà.

Local per sa stgaudar e consumar insatge

Or da l'inscunter da sortida e party duai dar in local nua ch'ils giasts possian sa stgaudar e consumar insatge pitschen avant ch'ir a chasa. Vul dir, i na dess betg pli in local per ir a tschaina ubain in local da divertiment en furma da disco. Il 'Bolgen Plaza' duai dentant survegnir ina permissiun excepziunala per pudair avair avert in zic pli ditg.

Cun quai pudess l'accusader er viver

L'advocat da l'accusader ha confermà envers la gasetta Südostschweiz che ses mandant pudess viver cun questa schliaziun. I na dastgia dentant betg puspè dar ina localitad da festas. L'advocat ha anc precisà ch'i na sa tractia tar ses mandant betg simplamain d'in possessur da segundas abitaziuns. Ses mandant dettia a fit pliras abitaziuns sur onn ad indigens e quels hajan reclamà pervi da la canera.

RR novitads 7:00