Plirs tschient aspectaturs – scienziads ed uffizials – da l'entir mund han persequità l'experiment a l'ur da la via dal pass dal Flüela. Tar blers era il motiv da pudair profitar da la savida dals scienziads svizzers en connex cun tecnologias da protecziun.
Cun in zic retard ha il helicopter lura transportà ils trais crapuns sin la plattafurma da partenza en la spunda. Cun ruclar giuador han massa sensurs registrà mintga sigl, mintga rotaziun dals crapuns. Davent da la via han cameras ed or da l'aria ina drona documentà l'experiment. Quai han ils scienziads da l'institut da Tavau repetì pliras giadas ed uschia rimnà massa datas per lur program da simulaziun.
Simular crudadas da crappa uschè realistic sco pussaivel
I saja la finamira da rimnar uschè bleras datas sco pussaivel, uschia Andrin Caviezel, in dals manaders dal project. Las datas vegnan lura rimnadas en in model da computer per simular crudadas da crappa. E pli bleras datas ch'il program ha e pli exactas che las simulaziuns daventan – per pudair dir tge crappa che croda co.
Da bun vegnan quellas lura a biros d'inschigner u uffizis da construcziun. Quels pon grazia a las simulaziuns decider pli simpel p. ex. nua bajegiar ina nova via, dovri ina gallaria u ina rait da protecziun e cun quanta crappa èsi da quintar sch'i vegnan giuador.
Tenor Andrin Caviezel dovri dentant anc blers sumegliants test sco quel al Flüela per far vegnir il program da simulaziun uschè realistic sco pussaivel. Quai cun crappa da differenta furma e paisa ed en differents lieus.
Prevegnir ina situaziun da bovas sco a Bondo è tenor l'expert da l'Institut per la perscrutaziun da naiv e lavinas però tut in auter tema. Quest model qua simuleschia ina crudada da crappa e betg ina bova.
RR actualitad 17:00