Passa 80% dals dumandads èn da l'opiniun ch'i dovra vinavant ina gasetta rumantscha quotidiana. I tanschess dentant era sche la gasetta cumparess mo duas fin trais giadas l'emna.
Plinavant sorta da la retschertga che 44% dals lecturs èn sur 60 onns. Be 16% èn sut 35 onns. Legida vegn la Quotidiana principalmain pervi dals temas locals. Er pon passa la mesadad dals lecturs s'imaginar ch'i dess en l'avegnir la gasetta be pli online. La retschertga è vegnida preschentada la sonda a la radunanza da delegads da la Lia Rumantscha.
Tge giavischs han ils delegads per la Quotidiana dal futur?
Ina gasetta online u vinavant ina gasetta stampada? Ina gasetta rumantscha en la rait saja il futur, dentant saja i vinavant impurtant da porscher ina gasetta stampada, è il tenor da las delegadas e dals delegads.
Proxims pass
Sco proxim sa metta la gruppa Medias Rumantschas 2019 vid la lavur. Sco emprim saja da contractar cun il chantun e la confederaziun davart il plan da termins, declera Martin Gabriel, secretari general da la Lia Rumantscha e manader dal project Medias Rumantschas 2019. Plinavant vegni era tschertgà il discurs cun l’editur da la Quotidiana per guardar sche la gasetta vegniss era anc squitschada il 2019 per avair uschia dapli temp per planisar il futur.
Silsuenter èsi planisà dad ir en las differentas regiuns rumantschas per sentir il puls e per dumandar tge che vegn spetgà en il futur dad ina gasetta rumantscha.
Iniziativa «No-Billag»
Plinavant èsi vegnì decidì da sustegnair activitads cunter l'iniziativa No-Billag cun 100'000 francs. Plirs votums hajan demussà la necessitad da mobilisar la populaziun cunter l'iniziativa, scriva la Lia Rumantscha. L'iniziativa da No-Billag vul abolir las taxas da radio e televisiun.
RR novitads 14:00++
