La PPS gida ses pli grond inimi

La partida populara da Cuira propona vinavant Hanspeter Hunger per il segund scrutini da las elecziuns per la suprastanza da Cuira e rumpa uschia l'allianza burgaisa. Tenor il schefproducent RTR Valentin Schmed è quai in zic in teater politic.

Valentin Schmed.

Legenda da maletgs: RTR

La decisiun da la radunanza mussia però er ch’i giaja vess per commembers dal a PPS da sustegnair in candidat da la partida burgais-democratica.

«Cortesi n’ha betg ponderà che la PPS vul»

Il crutsch saja, ch’il president da la PPS da Cuira, Mario Cortesi n’haja betg ponderà bain avunda tge ch’ils commembers da la PPS veglian. Il glindesdi haja el annunzià che la PPS fetschia part da l’allianza burgaisa, quai però betg cun persvasiun. El haja dentant annunzià quai publicamain savend che quai pudess forsa esser dispitaivel tar la basa da la PPS.

En mintga cas avessi el fatg pli perdert da spetgar giu la radunanza dal mardi saira e communitgar là la strategia da la partida. La decisiun da la radunanza mussia però er ch’i giaja vess per commembers dal a PPS da sustegnair in candidat da la partida burgais-democratica.

«La PPS gida ses pli grond inimi»

Valentin Schmed punctuescha che la separaziun da la PBD e la PPS saja entant 8 onns enavos e tuttina na saja questa plaja anc betg guarida. Ins na saja anc adina betg pront da siglir sur l’atgna sumbriva. Il scenari vegnia ad esser che Patrick Degiacomi da la PS vegnia elegì ils 26 da zercladur e quai grazia a las manevras da la PPS da Cuira, en sasez il pli grond inimi politic dals social-democrats.