Siglir tar il cuntegn
Inhalt

Ulteriur Grischun La pli gronda festa da tschaiver

La musica da tschaiver «Schamaroper Poper» ha envidà al bal da musicas da tschaiver. Reclama han els fatg il suentermezdi cun laschar sunar entamez la citad da Cuira. Millis han dà suatientscha a l’invitaziun.

La festa en cifras

  • 8 guggas èn da la partida
  • 55 commembers han ils «Schamaroper Poper»
  • 110 persunas lavuran la saira
  • 2'000 aspectaturs vegnan spetgads

Gia il suentermezdi han las musicas da tschaiver concertà sin la plazza Alexander tar la via da la staziun a Cuira. Sin ina pitschna tribuna da puntanadas ha mintga musica sunà 3-4 chanzuns. Da la partida era la musica da tschaiver Las Bagordas da Mustér. Quai saja tuttina sch’els sunian avant 5 ni avant 2’000 persunas, ha ditg Clau Dermon, il president da Las Bagordas, els dettian adina tut.

La festa attira millis

La saira, en la halla da la citad da Cuira, hai dà in auter public. Nagins uffants, blers giuvens e giuvnas, intgins anteriurs commembers da guggas pli vegls. La halla veseva ora in zic sco ina fiera, cun divers stans da bavronda e maglia.

Organisada vegn la festa da la musica da tschaiver «Schamaroper Poper» da Cuira. Radund 2’000 visitaders vegnan spetgads. Gianin Bergamin da la musica da tschaiver da Cuira è losch da la festa. Ils da Cuira e conturn hajan gugent il tschaiver e fetschian gugent festa. E la maschaida da musicas da tschaiver renumadas e da musicas da la regiun carmalia blera glieud.

RR actualitad 08:00