«Japanimanga Night» a Tavau

Normalmain s'inscuntra en il center da congress a Tavau politichers cun tschop e cravatta. Tut auter questa fin d'emna. Sur sonda e dumengia (30/31-5) èn s'inscuntrads a Tavau fans dal pajais Giapun cun costums extravagants e plain colurs.

stan da martgà cun peruccas

Legenda da maletgs: Al martgà da rauba giapunaisa a la Japanimanga Night. RTR, F.Caduff

Els vegnan numnads cosplayers. L’inscunter da la scena da cosplay è in dals highlights a la «Japanimanga Night».

Tut è giapunais

La «Japanimanga Night» na dess però betg esser mo in inscunter da cosplayers. L’idea dal Festival saja da viver la cultura giapunaisa, di il uschenumnà schefpirat Lukas Zuberbühler. Perquai datti differents workshops per emprender ad enconuscher meglier la cultura. Ins po per exempel emprender a cuschinar Sushi, a far origamis u era emprender giapunais. Era datti differents concerts da musica giapunaisa, shows ed in martgà che venda da tut sorts raubas giapunaisas.