A Tavau èn s’inscuntradas ils ultims dis pli che 50 persunas per discutar sur da la capacitad da noss tscharvè. La finamira principala dad els, èsi da chattar il «Brain Code», pia co funcziunescha noss tscharvè e daco funcziunescha noss tscharvè uschia.
Sviluppar cuminaivlamain prototips
Talents ord l'entir mund, vegnan en contact cun expertas ed experts da la perscrutaziun dal tscharvè e da l'intelligenza artifiziala. En gruppas pli pitschnas vegnan alura sviluppads prototips da maschinas ch'èn uschè intelligentas sco umans. La finamira è da sviluppar vinavant quels prototips era tranter ils inscunters planisads.
Inscunter decentral sco schanza
L'inscunter è concepì sapientivamain decentral a Tavau e betg en ina universitad. Tut la savida vegn rimnada ed a las participantas ed als participants vegn garantì che lur cumpart dal project vegn era cumprovada en protocols – uschia che nagin sto temair, sch'el u ella porta la schliaziun ultimativa, che auters van cun las arbajas.
Planisads èn 10 missiuns
Ils iniziants numnan il project ina missiun. Uss ha cumenzà la missiun 1 ed en radund in mez onn è planisada la missiun 2. En tut vulan ils iniziants manar tras 10 da talas missiuns fin il 2021 cun la finamira da chattar l'intelligenza artifiziala e dad effectiv pudair duvrar quella. La finanziaziun è il mument garantida tras la fundaziun «Mindfire». Quella fundaziun ha sia sedia en Svizra e na vul far nagin profit.
RR Actualitad 17:00