Siglir tar il cuntegn
cuntegn

Ulteriur Grischun «Insatge auter che scola»

Il stgalim aut da Trimmis ha passentà in di en il guaud. Ils scolars e las scolaras duajan chattar uschia puspè la fascinaziun per la natira. Sin il program steva mirar selvaschina, cuschinar ni gidar il selvicultur.

La damaun sa spartan ils 85 scolars e scolaras en sis gruppas. Mintgin po tscherner ses champ preferì: els han da tscherner tranter cuschinar, selvaschina e chatscha, guaud e selvicultura, il castur, utschels ed avieuls u da scriver in rapport dal di. Ils singuls posts na mainan betg ils magisters. Chatschaders, commembers da Pro Natura u il selvicultur dal vitg mussan als uffants dal stgalim aut lur champ.

Ils highlights seguan il suentermezdi: il selvicultur smerscha in bostg, il chatschader demonstrescha ses chaun da sang.

In'idea da la maisa radunda

Vi da la maisa radunda haja il president da la secziun da chatschaders Calanda, Barthli Schrofer, discutà cun il magister Curdin Meuli sur dal guaud. Els eran daperina ch'i fiss interessant da mussar quel mund als giuvens.

Tar ina sesida da magisters ha lura Curdin Meuli preschentà sia idea – e ses collegas eran intgantads. Senza far lungas hajan ils chatschaders ed ils magisters lura organisà la glieud.

In di plain visitas

Il di era er in'occasiun per communitgar la bun'idea ch'ils da Trimmis han gì: Durant il di è er il cusseglier guvernativ Mario Cavigelli vegnì sperasvia. El e vegnì accumpagnà da collavuraturs da l'Uffizi da chatscha e da l'Uffizi per guaud.

Enpli eran tant il president dal vitg ed il president dals burgais da Trimmis sco er divers schurnalists da la partida.

RR actualitad 08:10