Siglir tar il cuntegn
Inhalt

Ulteriur Grischun Incendi a Tusaun: «Nus avain gì in'armada d'anghels pertgiraders»

Gievgia hai dà in incendi grond a Tusaun. Il bajetg da vendita da la Landi, il magazin e la stizun dal tancadi èn devastads dal tuttafatg. Daco ch'i ha brischà na san ins anc betg. Per stizzar il fieu èn 150 pumpiers stai en acziun. In incendi grond che ha prendi ina buna fin.

Il cumandant dals pumpiers da Tusaun, Reinhard Ziegler, avant las ruinas da la Landi.
Legenda: Reinhard Ziegler, cumandant dals pumpiers da Tusaun, manegia ch'ins haja gì cletg. RTR, Angela Hendry

Il fim morda en il nas, la naiv è tschuffa da la tschendra, pumpiers e policists van vi e nà. Da la Landi n’è betg restà bler auter che ruinas brischadas. Il fim han ins vesì enfin tar il magazin dals pumpiers da Tusaun, raquinta Reinhold Ziegler, cumandant dals pumpiers da Tusaun. Il bajetg da lain, ils products d’agricultura, l’isolaziun, quai saja stà maglia per il fieu e quai haja chaschunà questa immensa pitga da fim.

in camiun, ruinas brischadas, il tancadi.
Legenda: Da la Landi n'èsi betg restà bler auter che ruinas brischadas. Angela Hendry

Betg privlus

In mument han ins temì ch’il tancadi avant la Landi piglia forza fieu. La situaziun saja però stada l'entir temp sut controlla. Era per ils pumpiers na saja quai betg stà privlus, cunquai che tuttas persunas hajan chattà la via ora dals bajetgs na sajan nagins pumpiers entrai.

Buna collavuraziun

Durant tschintg uras han 150 pumpiers da Tusaun, Cazas, Cuira e Muntogna Sura cumbattì il fieu. La collavuraziun saja stada perfetga, di Reinhold Ziegler. Malgrà che quai è stà in grond incendi na saja quai betg sta in dals menders incendis da Tusaun.

L'onn passà èn ina chasa ed ina scrinaria brischadas ora dal tuttafatg. L'onn 2010 saja stà il mender incendi a Tusaun, entamez il center dal vitg. Dal incendi dad uss hajan tuts gì in'armada d'anghels protecturs, cunquai ch'ì haja dà sulettamain donn da rauba, e betg da persunas, di Ziegler.

in auto da pumpiers che pumpa ora aua da las ruinas.
Legenda: Ils pumpiers pumpan viadora l'aua. Angela Hendry

RR actualitad 17:00