Per la qualitad da viver en il vitg èn omadus sviaments da grond avantatg. Avant passava numnadamain l'entir traffic dal Purtenz tras Küblis e Saas. In levgiament ch'ils abitants e la abitantas schazegian fitg, saja quai suenter be trais emnas u suenter bun 5 onns.
Uss pon ins traversar la via principala per ir en l'ustaria visavi senza che 100 autos passan sperasvi.
Sfida per la gastronomia
Las emprimas reacziuns dals giasts sajan stadas fitg bunas, di Ursi Steinmann, hoteliera ed ustiera a Küblis. Cunzunt pervi dal ruaus sin la terassa da l'ustaria che saja gist dasper la via principala. Tuttina vegnian ins probabel a sentir a lunga vista ch'ils giasts dal traffic da transit che faschevian fin uss magari ina pausa a Küblis manchian in zic, uschia Steinmann vinavant.
Tancadi da Küblis e pereclità
Cunzunt la fin d'emna sajan las frequenzas idas fermamain enavos, uschia Erika Nett, la manadra dal tancadi. Ella spera dentant che la clientella indigena stettia fidaivla al tancadi, lura possia quel tut tenor exister vinavant.
Sch'i dat dentant, sco planisà da la vischnanca da Luzein, in nov tancadi avant il portal dal tunnel, lura na vesi betg ora bain per quest tancadi.
Fatschentas èn optimisticas
Plirs mainafatschentas da Küblis, tranter auter Julia Gruber dal Coop u er Anja Rofler da Caprez Sport han sincerà envers RTR ch'ellas sajan per gronda part dependentas da clientella da teschep ed ord la regiun e betg dal traffic da transit. Uschia èn ellas perschuadidas ch'il sviament haja strusch consequenzas negativas per lur fatschentas.
Experientschas a lunga vista a Saas - cunzunt grev per la gastronomia
En la stizun dal vitg n'haja ella betg senti bler dal sviament, ha ditg Dorothea Heldstab che maina la stizun dapi 10 onns. La via, quella tutgia uss plitost als peduns ed als velocipedists. Er per ils uffants saja il sviament in grond avantatg, uschia Heldstab vinavant. La ruassaivladad en il vitg saja magnifica.
Questa ruassaivladad è dentant be ina vart da la medaglia. Dorothea Heldstab è creschida si en in'ustaria e punctuescha ch'il turissem saja sa reducì marcantamain dapi l'avertura dal sviament.
Quai conferma er la hoteliera ed ustiera Karin Strehler. Avant il sviament haja ella gi blers giasts dal traffic da transit. Cun il tunnel da sviament saja quai sa midà daltuttafatg. Karin Strehler ha sco consequenza da quai midà model da fatschenta e mess dapli paisa sin las chombras dal hotel che sin l'ustaria. Uschia funcziunia quai bain per ella e ses um, i saja dentant bler pli grev d'exister d'in hotel u d'in'ustaria che avant il sviament sch'ins n'haja betg anc entradas supplementaras.
RR actualitad 11:00