Ils pilonis èn parents cun la pilona, il tgeiel oransch cun sdrimas alvas che fa attent da privels sin via. Ils pilonis han dentant anc ina fatscha rienta cun egls attents che suondan il traffic.
Cun quest med po l’instructur da traffic demonstrar a moda simpla als scolarets sco sa cuntegnair sin via. Il servetsch vegn purschì a tut ils scolarets e scolarettas da la cità da Cuira. L’instructur da traffic Gian-Rico Keller visita tut las 31 scolettas e fa attent ils pli pigns burgais sin ils privels da traffic.
Investar bleras ressursas en la segirezza
Per il president Urs Marti ed il cumandant da polizia da la cità Ueli Caluori è la prevenziun dals uffants pitschens fitg impurtanta. Els investeschan bleras resursas en il servetsch. Ed era per l’instructur Gian-Rico Keller è si’instrucziun ina chaussa da cor. Sia visita cun ils pilonis fa grond plaschair als uffants pitschens ed els sa participeschan cun grond entusiassem.