Ils gieus da gruppa da la Svizra èn gia vendids ora, di l'organisatur Ivo «Fifi» Frei da l’uniun khur.ch. Per part haja quai mo duvrà paucas minutas per vender tut ils bigliets. Sper ils gieus da la Naziunala svizra èn oravant tut bigliets per gieus da las top-naziuns fitg dumandads. Per exempel da la Germania, da la Brasilia u da la Frantscha.
Fifi Frei è dentant era conscient ch’i dat gieus che na vegnan betg a procurar per tribunas plainas. In gieu tranter la Columbia ed il Giapun, in mardi suentermezdi, vegnia strusch ad attrair las massas. Tuttina èsi impurtant per ils organisaturs ch’i vegnia mussà mintga partida dal campiunadi mundial, era sch’ins fetschia in deficit cun tscherts gieus.
In campiunadi mundial senza l’Italia
Quitads fan ils organisaturs mo che pajais sco l'Ollanda, la Grezia u era l’Italia n’èn betg da la partida quest onn. Per Fifi Frei èsi oravant tut donn che noss vischins dal sid n’èn betg sa qualifitgads. L’Italia saja adina stada ina squadra che haja tratg massa fans. En il Grischun vivian ina massa Talians ed era massa persunas che hajan simpatias per l’Italia. Quels avessan fatg bain al public viewing. Tuttina quintan ils organisaturs cun fin 40'000 visitaders durant il mais dal campiunadi mundial en Russia.
RR actualitad 08:00