Siglir tar il cuntegn

Header

cuntegn

Ulteriur Grischun Il parc da l'RhB è avert per la publicitad

Davent dad immediat pon ins ir en il parc ch'è gist dasper il museum d'art a Cuira.

La Retica e la citad da Cuira eran sa cunvegnidas da porscher in ulteriur parc a la publicitad. Il dretg d'utilisaziun è il mument limità enfin la fin da l'onn 2016. Sch'i sa cumprova da laschar avert il parc, lura èsi previs ch'el restia avert er vinavant. Il parc en la via da la staziun è avert mintga di tranter las 6:00 e las 20:00 uras. El è accessibels davent da la via da la staziun sco er davent da la porta laterala dal museum d'art. La citad da Cuira è responsabla per urden e ruaus en il parc.

La porta gronda vegn averta.
Legenda: La porta gronda vegn averta. RTR, Gion Gieri Flepp

Be las portas pitschnas èn avertas

I para sco sche la Viafier retica avriss be navidas il parc. Durant l'emna èn avertas numnadamain be las duas portas pitschnas da l'entrada principala visavi dal Manor. La porta gronda amez vegn averta be durant la fin d'emna. Tenor Renato Fasciati, il directur da la viafier, è quai per mussar a la glieud ch'i vegnia lavurà durant l'emna en il bajetg istoric.

Chapientscha per las resalvas

Il cusseglier da la citad Tom Leibundgut ch'è il 'bab' da l'idea d'avrir il parc chapescha tant enavant las resalvas da la viafier. Il parc saja stà serrà blers onns per la publicitad, uschia saja quai ina gronda midada per tuts tar la Viafier retica.

Da vart da la citad hajan ins dentant bler pli paucas resalvas, uschia Leibundgut. Cun il parc Fontana che tutgia a la Banca Chantunala Grischuna hajan ins fatg bunas experientschas. Uschia vegnia era a funcziunar en il parc da la viafier, è Tom Leibundgut persvadì.

audio
Saira: Parc da l'RhB daventa public
ord Actualitad dals 14.09.2016.
laschar ir. Durada: 2 minutas 36 Secundas.

Lungas contractivas

Per vegnir a la cunvegna tranter citad e viafier ha Tom Leibundgut contractà passà in onn cun la viafier. Tenor la cunvegna è la viafier responsabla per la tgira dal parc durant l'emna e la citad principalamain la fin d'emna. Plinavant ha la polizia da la citad survegnì la lubientscha da procurar per la segirezza en il parc. L'avertura uffiziala dal parc per la publicitad è ina part da la visiun dal cusseglier da la citad da far or dal center da Cuira ina gronda zona per peduns.

RR novitads 16:00

Artitgels legids il pli savens