Il Grischun sco Mecca dal mountainbike

21 milliuns francs metta il chantun Grischun a disposiziun per sustegnair e promover projects turistics innovativs, quai en il rom da "Grischun 2014-2021".

ir cun mountainbike

Legenda da maletgs: En il Grischun datti bleras purschidas per mountainbikers, sco qua en l'Engiadina. Keystone

Enfin ussa eran ils projects memia pauc madirs. Ussa ha dentant in project persvadì il cussegl da turissem. Il project da mountainbike "Flow Country Graubünden" tschiffa ils proxims 4 onns 430'000 francs dal chantun.

Il project deriva da Thomas Giger, in fervent mountainbiker, che ha fundà la fatschenta "Swiss Sports Publishing". Quella edescha chartas da rutas da mountainbike ed il magazin "Ride".

Rait da purschidas per turissem da mountainbike

Cun il sustegn dal chantun po la fatschenta pitschna da 5 persunas lantschar ses project. "Flow Country Graubünden" è ina rait da purschidas per turissem da mountainbike en il Grischun. En bun in onn datti ina pagina d'internet ed ina app, cun quellas po il turist da mountainbike planisar e cudeschar sias vacanzas. Uschia vegn preschentà la purschida ch'è avant maun, dentant vul il project era sviluppar novs products.

La finamira saja da carmalar massa osps en il chantun, dentant era da porscher ad els in'experientscha singulara, uschia ch'ils osps laschian enavos dapli daners en la regiun, di Thomas Giger.

Mountainbikers sco schanza

Il cussegl da turissem ha adina accentuà, ch'el sustegnia mo projects che sajan buns ed innovativs. "Flow Country Graubünden" è en quest senn innovativ, ch'el è cumplessiv. I vegn sviluppà products, communitgà e vendì las purschidas.

Il chantun Grischun saja avert envers la scena da mountainbike, envers purschidas e novs products, di Giger, surtut era per animar il turissem da stad. Quai saja en Svizra, gea en l'entira Europa zunt singular. Il Grischun na vesia betg ils mountainbikers sco privel u problem, mabain sco schanza.

Il project ma er Thomas Giger persvadan

Thomas Giger haja il temp, la savida e l'euforia per realisar il project innovativ, di Eugen Arpagaus, il manader da l'Uffizi da turissem ed economia grischun. Il plan co realisar "Flow Country Graubünden", co far vegnir enconuschent el e co far daners cun el, quel saja fatg per ils proxims 5 onns. Uschè in plan concret manchia tar ils ulteriurs projects.

Innovativ vi dal project da Giger na saja betg exnum l'idea da colliar tut ils partenaris grischuns en ina rait, mabain da realisar questa visiun.

La finamira per il chantun è, ch'il project haja success, carmalia osps en il Grischun e laschia uschia in bel rap en la regiun. Dentant era ch'il project stimuleschia l'entir chantun da crear purschidas per turists da mountainbike, rutas, infrastructura, experientschas. Uschia survegnissia il turissem da stad dapli schlantsch, ina perspectiva per il futur.