Siglir tar il cuntegn
Inhalt

Ulteriur Grischun Il di suenter la schelira en il Signuradi

Pervi da la notg fraida hai bain dà singuls donns en las vignas dal Signuradi. Actualmain na vesi dentant betg ora uschè nausch sco temì, ha ditg il president da la branscha «Vin Grischun» Georg Fromm sin dumonda. Ils donns en detagl possian ils viticulturs dentant evaluar pir en il decurs dal di.

Chandailas da tschaira duain proteger las vignas da la schelira.
Legenda: Chandailas da tschaira duevan proteger las vignas da la schelira. Keystone

La notg sin la gievgia è stada ina plain tema per blers purs. Er ils viticulturs dal Signuradi han tremblà per lur vignas pervi da la schelira. Cun differentas mesiras han els dentant empruvà da proteger ils chatschs giuvens. Ils sgols da helicopter planisads n’han betg gì lieu.

En pliras vignas dal Signuradi han brischà la notg passada grondas chandailas da tschaira. Cun plazzar quellas en intervals regulars han ils viticulturs vulì proteger lur vignas da donns da schelira.

Ma las chandailas eran svelt vendidas, e mo ina pitschna part dals viticulturs ha pudì far diever da questa metoda.

Nagins helicopters

Cun dar in emprim sguard oz a bun’ura hajan ins dentant gia vis ina u l’autra parcella che haja patì da la schelira, di Georg Fromm, president dals viticulturs grischuns. Dapli infurmaziuns dettia quai il pli baud il suentermezdi.

Oriundamain duevan helicopters sursgular las vignas durant la notg. Ils viticulturs avessan era gì la lubientscha da la Confederaziun da sgular cun helicopters sur las vignas per smatgar a bass l’aria chauda. La lubientscha haja dentant valì per helicopters a dus motors, ed a disposiziun stevan a curta vista be helicopters ad in motor.

RR novitads 11:00