Siglir tar il cuntegn

Header

Navigaziun

chasas cun stizuns, bel'aura, Landquart
Legenda: Il Designer Outlet a Landquart po avrir tut las dumengias senza permiss, quai ha decidì il Cussegl federal. mad
cuntegn

Ulteriur Grischun Il Designer Outlet Landquart po avrir la dumengia

Centers da cumpra che servan als basegns dal turissem internaziunal pon occupar persunal durant tut las dumengias da l'onn senza ina permissiun. Quai propona il Cussegl federal en sia revisiun da l'ordinaziun per la lescha da lavur. Ils centers da cumpra ston dentant ademplir premissas definidas.

La nova ordinaziun preveda che las almain 26 dumengias libras ad onn, ch'èn da garantir al persunal, pon vegnir repartidas irregularmain sin in onn calendar. Entaifer in quartal dal calender è dentant da dar almain ina dumengia libra. La regla va exclusivamain per ils centers da cumpra e betg per manaschis singuls. Il persunal pertutgà survegn per la lavur da dumengia cumpensaziuns che surpassan las directivas legalas.

Chantuns proponan ils centers

Il Departement federal per economia, furmaziun e perscrutaziun fixescha ils centers da cumpra pertutgads sin proposta dal chantun. In da quests centers da cumpra en il Grischun è il Designer Outlet Landquart. La revisiun va en vigur l'emprim d'avrigl 2015.

L'ordinaziun fixescha era ils criteris pertutgant la purschida da products, la svieuta ed il lieu dal center. Il center sto per exempel sa chattar en in territori turistic tenor artitgel 25, a linea 2 da la lescha da lavur. Alternativamain po il center da cumpra era esser en ina distanza da maximalmain 15 km davent dal cunfin svizzer ed en la vischinanza d'ina staziun u d'in access a l'autostrada.

Il scumond da lavurar la dumengia vegn sutminà

Il Cussegl federal haja preschentà in'ordinaziun che sutminescha vinavant il scumond da lavurar la dumengia. Per tscherts centers da cumpra vegn introducì lavur da dumengia permanenta, crititgescha travail.suisse, l'uniun independenta dals lavurers. Ella è schoccada ch'ils interess dals lavurers na vegnan betg resguardads avunda.

Regenza ha decidì cunter il Tribunal federal

Il settember 2014 ha la regenza grischuna decidì che las stizuns dal Designer Outlet a Landquart duain restar avertas vinavant la dumengia. Ella ha interpretà ina sentenzia dal Tribunal federal en quest senn ch'ì na dettia nagina obligaziun da serrar las stizuns per immediat la dumengia. La dretgira a Losanna haja tratg sia decisiun resguardond relaziuns dal dretg da lavur che na correspundian betg pli a las realitads actualas. Uschia la resposta da la regenza grischuna sin ina dumonda da la fracziun socialdemocratica dal Cussegl grond.

Unia ha recurrì tar il Cussegl federal

Pervi da la vendita da la dumengia en il Designer Outlet a Landquart è il sindicat Unia sa drizzà al Cussegl federal. Il sindicat aveva pretendi ch'il Cussegl federal duaja procurar ch'il chantun Grischun sa tegnia vi da la sentenzia dal Tribunal federal.

Dispita dapi l'avertura

Il center da cumpra sper l'access da l'autostrada a Landquart datti dapi il 2009. Cumenzà ha il center sut il num Alpenrhein Village Outlet. Dapi lura datti la dispita tranter il chantun ed il sindicat davart la lavur da la dumengia.