Ils sforzs da las organisaziuns da turissem per promover la Svizra sco pajais per velocipedists paran da purtar fritg. Lai è ina da las regiuns ch'è sa sviluppada il pli fitg ed il pli lunsch en il sectur per velos da muntogna. Il parc ed era autras rutas èn enconuschentas lunsch enturn.
Il 2010 han las pendicularas da Lai anc nudà 136'104 entradas la stad, il 2018 eran quai gia 235'396. In dals facturs principals: il turissem da bike. Da las entradas èn il 2018 var 57% stads viandants e 43% velocipedists.
Questas dimensiuns pretendan era ina pli cumplexa organisaziun da mantegniment e salvament. I n'è numnadamain betg fatg cun bajegiar il parc. Perquai posseda Lai in'atgna equipa sut Lukas Reinhard ch'è sulettamain responsabla per il parc da bike e las lavurs ch'i dat en ed enturn quel parc. Durant la stad lavuran sis persuns cumplainamain en quella gruppa.
Betg be las pendicularas profiteschan
Il boom da bike han er las fatschentas da sport sentì. Uschia avevan p. ex. ils Baselgias cumenzà l'onn 1989 be cun skis da passlung e servetschs latiers. Ils onns 90 han els lura però gia gì ils emprims velos en stizun. Ed il 2011 ha la famiglia Baselgia cumplettà sia purschida cun in'atgna butia da bike, nua ch'ins po tant cumprar sco er affittar ils velos. Quella vegn actualmain anc ina giada engrondida ed è lura pronta per la proxima stagiun.
Ils baselgias dattan a fit fin 50 velos per di e vendan fin 200 novs ad onn. Tranter quels èn era intgins e-mountainbikes ch'èn il mument fitg populars e custan fin passa 10'000 francs. Ma ils Baselgias n'èn betg la suletta fatschenta che profitescha dal boom da bike. Quai mussa gia la cifra da var 350 bikes che vegnan dads a fit en l'entira regiun.
RR actualitad 08:00
