Siglir tar il cuntegn
cuntegn

Ulteriur Grischun HTW prosperescha e forsa datti in nov campus en praschun

L'onn 2016 ha la scol'auta da tecnica ed economia fatg or da la sperdita budgetada da 800'000 francs in gudogn da 25'000 francs. Plinavant ha ella gì tants students novs sco anc mai. Il nov campus è necessari, nua che quel vegn è dentant anc adina betg cler.

Legenda: Guardar il video Va la HTW en praschun?. Durada 02:21 minutas.
Or da Actualitad video dals 28.06.2017.

Dapi onns vegn speculà nua ch'il nov campus per la HTW pudess vegnir. Ils schaner 2017 ha la regenza grischuna decidì ch'el vegnia en mitga cass a Cuira ed uschia serrà or la varianta Landquart. Actualmain èn las localitads da la scol'auta derasadas èn 9 differents lieus en tschintg bajetgs a Cuira. Igl è in grond giavisch da la HTW da diminuir il dumber da localitads, er quellas prendidas a fit.

Chantun preferescha dus lieus

Il chantun preferescha la varianta d'engrondir il bajetg principal da la HTW a la Pulvermühlestrasse e da nizzegiar l'areal da la Neumühle gist sper la staziun per novs indrizs. Er la varianta da stgarpar giu la Stadhalle per eriger in nov Campus è tenor il rectur da la scol'auta Jürg Kessler anc sin la glista. Per la HTW n`è l'areal da la Stadhalle dentant betg propi ina opziun. I giess memia ditg fin ch'ins pudess cumenzar a bajegiar, uschia Kessler.

La praschun dal Sennhof è ina varianta sco tut tschellas

A partir dal 2019 dessi plaz en la praschun Sennhof gist sut ils orts da l'Uvestg cura ch'ils praschuniers midan en la nova praschun a Cazzas / Realta. Tenor Jürg Kessler vegnia quella varianta examinada sco tut tschellas ch'èn sin la glista dal chantun. Sch'il Sennhof è propi sin questa glista e tge lieus ch'èn ultra dals enconuschents anc sin la glista n'han ni Jürg Kessler ni Mario Cavigelli il schef dal departament da construcziun vulì tradir. Mario Cavigelli quinta dentant cun ina decisiun da la regenza l'avust u il settember.

Cuntinuar cun la via en l'independenza

Tenor la presidenta dal cussegl da la scol'auta professiunala, Brigitta Gadient, resta la strategia vinavant da porscher scolaziuns da buna qualitad ch'ins possia far nagliur auter che a Cuira. L'exempel dals studis da bachelor en Digital Business Management e Photonix mussian che quai haja success. L'onn passà sajan 60 students s'inscrits per quels.

Il mument è la HTW anc part da las scolas autas professiunalas da la Svizra orientala. Finamira a lunga vista è dentant da vegnir independenta e sin quella via sajan ils novs studis unics in impurtant pass. Il process d'accreditaziun è gia instradà e tenor Brigitta Gadient sin buna via. Il proxim pass è la decisiun dal cussegl d'accreditaziun. Cun quella quenta Gadient il pli baud vers la fin da l'onn. Sche quella è positiva po il chantun suenter far la dumonda tar la Confederaziun.

RR actualitad 06:00