A Grüsch sez fiss planisada ina halla virtuala. Cun agid da la pli nova tecnologia duessan ils giasts vegnir en in mund virtual da Heidi. E cun ir ad aut cun la pendiculara en il territori Grüsch Danusa arrivass ins en il mund natiral da Heidi. La finamira fiss da betg mo vesair l’istorgia da Heidi, mabain da far part activamain a l’istorgia.
Mess ad acta
Il project da 25 milliuns francs da las pendicularas Grüsch Danusa SA avess il sustegn dal “Heididorf” a Maiavilla. Il project porta il num “Heidi für Berg und Tal”, e l’idea dal parc datti dapi il 2007. Dentant han ils iniziants stuì metter ad acta il project pervi d’in toc terren che n’ha betg pudì vegnir surbajegià. Uss dentant è la situaziun puspè sa midada. Damai che Flumserberg planisescha uss era in vitg da Heidi, ston ils da Grüsch reponderar il project.
Mintga project da Heidi è bun
Però era sch’il project da Grüsch na vegniss betg realisà, è il president d’administraziun da las pendicularas Grüsch Danusa, Hans Peter Lötscher, ch’il Grischun e Grüsch vegnian era a profitar dal project dal vitg da Heidi al Flumserberg.
Heidi al Flumserberg
Al Flumserberg duai dar in nov vitg da Heidi cun dus novs hotels, ina nova telecabina sin il Maschgenkamm ed in percurs tras l'istorgia da Heidi sin l'alp da Mols. Tras la nova purschida quinta la regiun Flumserberg cun 200'000 giasts dapli ad onn.