Hamilton: «Il settember vegn bajegià»

Anc è l'areal da l'anteriura resgia gronda a Domat vid, ma davos las culissas prepara la firma Hamilton da Panaduz tut per pudair cumenzar a bajegiar anc quest onn quai a partir dal settember. Tuttina sajan ins en retard, conceda il schef Andreas Wieland.

Il maletg mussa ina vista sin l'areal da l'anteriura resgia gronda a Domat

Legenda da maletgs: L'areal da l'anteriura resgia gronda a Domat è vit. Keystone

I dettia blers detagls da reglar enfin l'emprima badigliada: Parzellar da nov l'entir areal, allontanar ils bajetgs e mirs existents, suttascriver il contract da cumpra, fundar ina nova firma cun il num «Hamilton Ems» etc. La dumonda da bajegiar vul la firma Hamilton inoltrar mez fanadur e lura cumenzar a bajegiar il settember.

Custs: 25 enfin 30 milliuns francs

Il bajetg da producziun che vegn realisà a Domat saja pli u main tuttina grond sco quel a Panaduz, ha Andreas Wieland declerà sin dumonda dad RTR. Ed el custia tranter 25 e 30 milliuns francs. Suenter la construcziun vul la Hamilton investir anc ina giada circa 20 milliuns francs - quai dentant en etappas per novs roboters, automatisaziuns u novas tecnologias.

RR actualitad bunura