Sis cristals
Il grond star a la notg da sport 2015 è stà Benjamin Raich. Il skiunz austriac è vegnì onurà cun in cristal per sia carriera extraordinaria. Durant dus decennis è Benni Raich stà ina da las grondas figuras en il circus da skis. El è dubel campiun olimpic, el ha gudagnà trais titels da campiun mundial sco er la cuppa mundiala generala.
Dus dals stars en Svizra
Dus ulteriurs sportists ch’han astgà turnar a chasa cun in cristal èn il giugader da hockey Reto von Arx ed il giugader da ballape Marco Streller. Omadus èn stads dus dals stars en lur sports ils davos bun 15 onns. Ed omadus han terminà quest onn ina grondiusa carriera.
Reto von Arx ha giugà 20 onns per il Club da hockey da Tavau ed ha gudagnà cun il HCD sis titels da campiun svizzers. El è er stà l’emprim svizzer ch’ha sajettà in gol en la meglra liga dal mund, la National Hockey League. Marco Streller ha gudagnà otg titels da campiun svizzer cun il FC Basilea. In ulteriur punct culminant en sia carriera è dentant er stà il titel da campiun tudestg cun il VfB Stuttgart.
Harting, Schaffelhuber e Volero Zürich
Ulteriurs victurs a la notg da sport a Tavau èn stads la Tudestga Anna Schaffelhuber ch’ha gudagnà tschintg giadas aur als gieus paralimpics da Sotschi il 2014, il Tudestg Robert Harting ch’ha dominà ils davos onns il sport da discus e l’equipa da ballarait Volero Zürich che dominescha il sport da ballarait en Svizra e fa era furora sin palancau internaziunal.
Per ina bun’atmosfera a la notg da sport 2015 ch’è vegnida moderada da Jann Billeter e Christa Rigozzi ha tranter auter procurà la band Pegasus. A la fin da la saira ha er chantà il tenor talian Michele Manfré.
RR Sportissimo 17:00