Siglir tar il cuntegn

Ulteriur Grischun Grischun – partys da goa èn er partys da drogas

Las partys da goa attiran mintga stad millis persunas da l'entira europa per exempel a Zernez, Filisur u Rona. Per pudair sautar atras trais fin quatter dis prendan blers dals visitaders drogas sco ecstasy, cocain ni amfetamins. Drogas ch'i dat uschiglio strusch en il Grischun.

Il nov rapport da dependenza da la Fundaziun grischuna d'agid per toxicomans.
Legenda: Il nov rapport da dependenza da la Fundaziun grischuna d'agid per toxicomans. RTR, Gion Gieri Flepp

Per la Fundaziun grischuna d'agid per toxicomans è quai motiv avunda per tematisar las drogas da party en il nov rapport da dependenza e s'engaschar per la prevenziun. Els sajan vegnids attents entras autras organisaziuns da prevenziun ch'il consum da drogas sin quellas partys saja fitg aut en relaziun cun autras occurrenzas, di Sebastian Kirsch, il mainafatschenta da la fundaziun. I saja per exempel dà en egl che giuvenils sajan vegnids tar talas pirlas en il rom da questas partys. Cifras exactas u studis davart il consum da las drogas da party en il Grischun na datti però betg.

Grischuns n'èn betg il problem

Tenor Sebastian Kirsch sa participeschian be paucs Grischuns a las partys da goa, ils blers visitaders vegnian da l'entira Europa. Tuttina dettian las partys la pussaivladad da vegnir en contact cun las drogas era als indigens. Las partys carmalian uscheditg las drogas en il Grischun. Savens vegnian ellas tenor Sebastian Kirsch da students da la bassa ch'enconuschian partys, nua che las drogas vegnian consumadas.

I dovra prevenziun secundara

Il mainafatschenta da la Fundaziun grischuna d'agid per toxicomans è da l'avis ch'i na saja en quest cas betg d'evitar che la glieud prendia drogas da party. Dentant dovria quai prevenziun en il senn da scleriment per quels che prendian las drogas, ma er per samaritans ed auters preschents a las festas.

La fundaziun na vul dentant betg s'engaschar sezza directamain a las partys, mabain sustegnair organisaziuns ch'èn gia activas sco Safer Dance Swiss. Plinavant vul la fundaziun s'engaschar ch'ils organisaturs da las partys en il Grischun sajan obligads da porscher e sustegnair la prevenziun supplementara.

RR actualitad 07:00