Siglir tar il cuntegn

Header

cuntegn

Ulteriur Grischun «Grand Hotel Schweiz» è il fil cotschen tras la stagiun

La direcziun dal teater da Cuira ha publitgà oz il program per la sessiun 2015/16. «Grand Hotel Schweiz» è il fil cotschen tras la stagiun. Hotels paran da fatschentar ils teatrists e las teatristas. Plirs artists presentan lur interpretaziun dals grandhotels sin la tribuna da la citad da Cuira.

In dad els è Felix Benesch, il reschissur oriund dal Grischun. Ensemen cun Ludger Nowak inscenescha el il toc «Hotel Victoria», in musical davart Vico Torriani. «Hotel Victoria» è stà ina emissiun da cuschinar dal chantadur da schlagher grischun dals onns sessanta. Il toc ha dentant lieu l'onn 1973.

Vico Torriani vul relantschar sia show preferida per puspè avair in pau success, perquai che ses schlaghers èn vegnids substituids da la musica da pop. Vico rumpa dentant la chomma. In substitut surpiglia il scepter e l'emissiun da cuschinar sa mida en ina cumedia divertenta.

audio
Mezdi: Teater Cuira – program d’enviern
ord Actualitad dals 11.09.2015.
laschar ir. Durada: 3 minutas 48 Secundas.

Teater per giuvens ed uffants

Il chantun Grischun ha augmentà sias contribuziuns per il teater da Cuira. Cun quels daners sa il teater engrondir la purschida per uffants e giuvenils. 24 producziun èn extra per ils aspectaturs pitschens. La sparta teater giuven maina il pedagog da teater Loris Mazzocco. El vuless era purtar il teater en las scolas dal chantun per svegliar l'interess dals uffants.

In program sgiaglià

Il teater da Cuira porscha en mintga cas in vast program. Sper teater vegn era mussà saut, comica, teater da figuras, musica ed anc bler dapli. La stagiun da teater cumenza ils 31 d’october 2015 cun la premiera «Ur», ina opera antarctica da l’Islanda.

Artitgels legids il pli savens