La radunanza communala da Tumein ha approvà unanimamain il credit dad 1,2 milliuns francs per realisar la nova plazza cumin en il vitg. Il project per la plazza cumin prevesa ina chasa da pliras famiglias, ina garascha sutterana ed in’ustaria.
Plinavant han els dà il consentiment ad in credit da 2,1 milliuns francs per cumprar 35 dils parcadis che vegnan realisads en connex cul project. Pervia da la grondezza dal project vevi dà opposiziun el vitg. Ils adversaris avevan inoltrà in’iniziativa sco cunter proposta per ina plazza cumin pajabla. En spezial levan els che la vischnanca cumpria pli paucs parcadis. L'iniziativa ha dentant fatg naufragi cun 164 na encunter 61 vuschs gea.
Ina via lunga da 40 onns
Dapi il 1972 cura che la veglia chasa cumin è vegnida stgarpada giu guarda la plazza ora sco oz. Ina plazza cun bun in tozzel parcadis, bauns ed intginas plantas. Tar ina part da la populaziun è gia dapi lura qua il giavisch da far insatge ord questa plazza, di Felix Jörimann ch'è creschì si a Tumein ed enconuscha bain l'istorgia dal vitg.
L'onn passà ha lura la vischnanca decidì da restructurar la plazza. Il project ch'è vegnì lubì gievgia saira è sin maisa gia dapi in onn. Il project ha numnadamain procurà per bleras discussiuns. Als ins è il project surdimensiunà, auters vulan ch'i vegnia finalmain fatg insatge or da la plazza cumin.
RR novitads 11:00
