Siglir tar il cuntegn
cuntegn

Ulteriur Grischun Giuvens daventan eroxs da finanzas

Emprender cumpetenzas da finanzas è savens ina chaussa lungurusa per giuvens e giuvnas en la vegliadetgna tranter 12 e 16 onns. Perquai datti uss il gieu da computer «FinanceMission Heroes».

Legenda: Guardar il video Tge è 'Finance Mission Heroes'?. Durada 02:55 minutas.
Or da Actualitad video dals 25.11.2016.

En il gieu ston ils scolars salvar ina citad fictiva da nauschs roboters ch’engolan daners. Ils scolars èn eroxs che cumbattan ils nauschs roboters, e quai plascha ad els. Il gieu saja divertents e tuttina emprendian els insatge.

Access a lur mund

Il scolast Walter Caprez è persvadì dal gieu e dal med d’instrucziun. Ils scolars sajan fieu e flama, perquai ch’il gieu da computers saja lur mund. Cun giugar tematiseschia el dentant era las expensas dals scolars. Daco han els cumprà insatge? Tge custs èn sa resultads?

Sin via vers l’independenza

Enfin uss èn ils scolars anc protegids dals geniturs, era finanzialmain. Dentant è la finamira ch’els daventian in di maiorens, independents ed autonoms. Cun sa schluitar en la rolla d’in erox che cumbatta era cun problems finanzials duessan ils scolars emprender d’ir enturn cun daners.