Cumenzà ha l'entira dispita suenter la mort dal fundatur Duri Capaul cun la dumonda: A tgi tutgan las radund 25'000 ovras? Las duas figlias Mierta e Gada Capaul eran da l'avis che la gronda part da la collecziun tutgia a la famiglia. Ils ulteriurs commembers dal cussegl da fundaziun eran dentant da l'avis che la collecziun tutgia a la fundaziun.
Per avair la maioritad en il cussegl da fundaziun aveva la presidenta Mierta Capaul prendì sia sora Gada ed autras persunas sin via inuffiziala en il cussegl da fundaziun. Il chantun ha lura sin fundament d'in plant da dus commembers dal cussegl incumbensà l'advocat Felix Schmid sco administratur, perquai ch'i n'era betg cler tgi che tutgava tar il cussegl da fundaziun e tgi betg. Quai n'ha betg plaschì a las soras Capaul ed ellas èn idas fin al Tribunal federal cunter quella decisiun.
Problem da partenza resta er senza administratur
La sentenzia dal Tribunal federal n'ha dentant betg sclerì la dumonda dal possess, mabain be tgi ch'è commember dal cussegl da fundaziun e tgi betg. Perquai ha il chantun uss retratg l'advocat Felix Schmid sco administratur. Uss èn la presidenta Mierta Capaul, I'advocat Gion Andri Decurtins ed il CEO da la Banca Chantunala Grischuna, Alois Vincenz, puspè en uffizi sco cussegl da fundaziun da la Fundaziun Capauliana.
Sche las soras Capaul vulan cumbatter vinavant per il posses da las ovras, n'è betg cler. Ellas n'èran betg cuntanschiblas. Gion Andri Decurtins, il sulet cuntanschibel dal cussegl da fundaziun, ha ditg envers RTR ch'el veglia contactar proximamain ils ulteriurs commembers dal cussegl per sclerir co ch'i giaja vinavant.