Siglir tar il cuntegn

Header

Navigaziun

Ina chasa d'ina famiglia cun curtgin.
Legenda: La chasa da la fundaziun "Gott Hilft" a Favugn. RTR, L. Cadonau
cuntegn

Ulteriur Grischun Fugitivs minorens a Favugn

12 giuvens dentar 16 e 18 ans abitan a partir da l'entschatta november en ina chasa da la fundaziun «Gott Hilft». Il chantun ed ils uffizis responsabels chattan instituziuns che surpiglian da tgirar ils giuvens minorens betg accumpagnads che dumondan per asil en Svizra.

La fundaziun «Gott Hilft” e vegnida fundada 1916 da Emil Rüpflin e sia dunna Babetta. Els han construi ina chasa d’uffants a Favugn. Il servetsch da la fundaziun è creschida cun ils onns. Ina chasa da vegls, hotels e scolas-dimoras tutgan tar la purschida da la fundaziun. Bunamain 100 onn pli tard dat la chasa d’uffants a Favugn il nov dachasa per 12 giuvens fugitivs minorens betg accumpagnads. La fundaziun ha surpiglia igl emprim mandat da prestaziun dal chantun.

Il project da pilot dal chantun e da la fundaziun

Il dumber dals fugitivs minorens betg accumpagnads e s’augmentà. L'onn passà eran quai 20 giuvenils, ussa vivan 59 giuvenils tut persuls en il chantun Grischun. I na deva nagin concept per quest dumber. Il chantun ed il uffizis responsabels han stuì reagir ed han elavurà in nov concept. Las giuvnas han lur dormitori en la claustra da Cazas. Ils pli giuvens fugitivs duessan vegnir plazzads en famiglias. Per ils giuvens han ils responsabels stuì tschertgar ina schliaziun. Fin ussa han els vivì en il center da transit Laret a Tavau. Quai n'era betg ina schliaziun ideala. Cun la fundaziun «Gott Hilft» datti ussa in'emprima schliaziun. Igl è in project da pilot. Ils responsabels rapportan adina al chantun da lur experientschas e mettan questas a disposiziun ad auters projects dal futur.

Il mandat da prestaziun dal chantun

La fundaziun dat als giuvens in suttetg e mira ch’els han in curs dal di reglà. Durant il di van els a scola a Cazas ed en il temp liber vegnan els accumpagnads. Las resursas persunalas da la fundaziun tanschan dentant betg per garantir ina buna tgira. Els ston engaschar persunal dal fatg e voluntaris che sa gidan. E la fundaziun sto drizzar en la chasa e mirar che l'infrastructura funcziuna. Lur impurtanta incumbensa e da dar als uffants in nov dachasa e da far ch’els sa sentan bain.

La vischnanca da Favugn

Cunquai ch’i sa tracta d’in mandat tranter chantun e fundaziun ha la vischnanca nagina influenza sin la decisiun. Els han da viver cun ils novs vischins. La chasa da la fundaziun «Gott Hilft» sa chatta amez il vitg da Favugn. Quai ha chaschunà reacziuns positivas e negativas, di la presidenta Lucrezia Furrer.

Gievgia (1-10-2015) datti ina infurmaziun per ils abitants da Favugn. Là vuless la fundaziun ensemen cun ils responsabels dals uffizis e dal chantun dar resposta a dumondas e preschentar il project. Per la fundaziun e la suprastanza da la vischnanca è ina communicaziun averta impurtant. Perquai pon ils abitants adina ir tar ils responsabels sch' i dat problems.