«Food waste» e co impedir che mangiativas sa tschentan en il rument, quai è adina puspè in tema che vegn discutà da differentas organisaziuns al Forum mundial d'economia. Insaquants hotels a Tavau na discuteschan dentant betg mo, mabain han in project da pilot che vul turnar cun ils «rests» da vivondas sin maisa. L'idea iniziala ha il plevon Stefan Pfister gì, ensemen cun l'hotelier Cyrill Ackermann da l'hotel Grischa.
Durant il WEF vegn cumprà enorm bler da mangiar - nagin vul ristgar ch'ils giasts bandunian il restaurant cun fom. E tut ils giavischs duain vegnir ademplids, davent dal salmun da l'Irlanda sur fritgs da Vietnam enfin a pais giaglina da la China
Dentant er il mantun da rests crescha cun empustar dapli. «Quai ha rut a mi il cor cur che jau hai vesì quants kilos mangiativas che sa tschentan en il rument», di Stefan Pfister. Perquai il project.
Betg idea tge che vegn ensemen
Durant l'emna dal WEF rimnan 13 hotels da Tavau quai ch'è restà enavos – per reparter quai en in restaurant improvisà a la populaziun. Natiralmain mo quai che n'ha anc betg bandunà la cuschina, e betg ils rests dals tagliers. E tut quests menus e «häpplis» vegnan lura rimnads en il center da cursa lunga a Tavau, nua ch'indigens pon ir a mangiar.
Tge combinaziuns da menus che quai dat: «betg idea», di Stefan Pfister. In pretsch na datti betg, mintgin po dar quai ch'el manegia en ina cassa da donaziun che va lura ad in project social da Tavau per uffants e giuvenils. Dentant, pertge far quai be durant il WEF?
I fiss schon ina finamira da far quai a lunga vista, lura ston dentant dapli hotels far part.
Ackermann menziunescha ch'el saja ina giada spanegià sch'il project da pilot funcziuneschia.
RTR actualitad 12:00