Siglir tar il cuntegn
cuntegn

Ulteriur Grischun Fieu en Posthotel ad Arosa ha cumenzà en tschaler

L’incendi en il Posthotel ad Arosa d’avant in’emna ha cumenzà en il plaun sutterran dal bajetg. Il venderdi han spezialists per l’emprima giada pudì entrar en las ruinas dal bajetg cun privel da sbuvada.

Il Posthotel ad Arosa n'ha betg pudì vegnir salvà – in di e mez ha il fieu brischà.
Legenda: Il Posthotel ad Arosa n'ha betg pudì vegnir salvà – in di e mez ha il fieu brischà. Keystone

Il fieu en il Posthotel ad Arosa durant la notg da Silvester ha cumenzà en il plaun sutterran dal bajetg. Quai ha confermà in pledader da la Polizia chantunala. En il sutterran sa chattian tschalers, dentant naginas cuschinas u locals publics.

Brischament da 36 uras

Il venderdi han per l'emprima giada spezialists pudì entrar en las ruinas dal Posthotel. Il privel che parts dal bajetg sballunan è dentant anc adina grond. Anc adina nuncler è daco ch’il fieu è rut ora. I vegn dentant intercurì schebain i sa tracta d'ina raschun tecnica, da malprecauziun ubain er d'in brischament intenziunà.

L’hotel da quatter stailas ha brischà durant totalmain 36 uras. Pir durant la notg da Bumaun ha il fieu pudì vegnir stizzà. Trais persunas èn vegnidas blessadas, ina grev, duas mez grev. Ulteriuras 10 persunas e trais pumpiers han stuì laschar tractar ambulantamain.

RR novitads 07:30